பிப்பெட்: வணக்கம் பியூ. நாம சந்திச்சு ரொம்ப நாளேச்சேன்னு எல்லோரும் தேட ஆரம்பிச்சிட்டாங்க!
பியூரெட்: இருக்கட்டும் பிப். மனுசங்களுக்கு மட்டும்தான் தீபாவளியா, நமக்கும் அது கொண்டாட்டம் தானே, சொந்த ஊருக்கெல்லாம் போய் வர வேண்டாமா?
பிப்.: நீ சொல்றது ரொம்பச் சரி. அதான் இப்போ நாம திரும்ப வந்துட்டோமே, அதுனால எல்லோரும் மகிழ்ச்சி ஆயிடுவாங்க.
பியூ.: உன்கிட்ட உறுதியளிச்சது மாதிரியே தீபாவளிக்கு நான் பட்டாசு வெடிக்கலை. மத்தவங்க வெடிக்கி றதை மாடிலேர்ந்து பார்த்தேன்.
பிப்.: உனக்கு ரொம்ப நல்ல மனசுதான். சொன்ன சொல்லைக் காப்பாத்திட்ட. அடுத்தடுத்த வருசங்கள்ல மத்தவங்களும் பட்டாசு வெடிக்கிறதை குறைச்சுக்குவாங்கன்னு நம்புவோம்.
பியூ.: நீ கார்ட்டூன்லாம் பார்ப்பியா?
பிப்.: என்ன பியூ. இந்த வாரம் தனிமத்தைப் பத்திப் பேசாம, வேற எதைப் பத்தியோ பேசிக்கிட்டே போறோம்.
பியூ.: எல்லாம் ஒரு காரண மாத்தான். கார்ட்டூன் பத்திச் சொல்லு.
பிப்.: ஓ! நல்லா பார்ப்பேனே.
பியூ.: அப்ப உனக்கு ‘பாப்பய்' பத்தித் தெரியுமா?
பிப்.: ஒல்லியா, மாலுமித் தொப்பி போட்டுக்கிட்டு, எப்ப பார்த்தாலும் வாயில் புகைபிடிக்கும் குழாயை வைச்சுக்கிட்டு வருவானே, அவன்தானே?
பியூ.: சரியாச் சொன்னே, அதே பாப்பய்தான்.
பிப்.: ஆனா, பாப்பய் கார்ட்டுன் இப்ப டிவி அலைவரிசைகள்ல வர்றதே இல்ல. பாப்பய் பத்தி புதுசா ஏதும் சொல்லப் போறியா?
பியூ.: பாப்பய் பத்தி இல்ல, அந்த கார்ட்டூன்ல புளூடோவோட பாப்பய் மோதும்போது, உடனடி சக்தி கிடைக்க என்ன சாப்பிடுவான்னு உனக்குத் தெரியும்தானே?
பிப்.: ஆங்கிலத்துல ‘ஸ்பினாச்’னு சொல்லப்படுற பசலைக் கீரை.
பியூ.: ரொம்பச் சரி.
பிப்.: இப்ப பசலைக்கீரைக்கு என்ன?
பியூ.: பசலைக்கீரை நிஜமாவே ரொம்ப சத்தானது, தெரியுமா?
பிப்.: எப்படி?
பியூ.: எல்லா கீரையும் சத்தானதுதான். அதுலயும் பசலைக்கீரையில் மக்னீசியம் நிறைஞ்சிருக்கு. மக்னீசியம், மனித உடலுக்கு ரொம்ப அவசியமான சத்துக்கள்ல ஒண்ணு.
பிப்.: மனித உடலில் அதிகமுள்ள 11-வது தனிமம் மக்னீசியம்னு ஏற்கெனவே நீ சொல்லியிருக்க. நான் ஞாபகம் வெச்சிருக்கேன்.
பியூ.: மக்னீசியம் இல்லைன்னா, கிட்டத்தட்ட 300-க்கும் மேற்பட்ட உடல் செயல்பாடுகள் நடைபெறாது. முந்தைய வாரம் பார்த்த பாஸ்பேட்டைப் போலவே மனித செல்கள், 300 என்சைம்களுக்கு மக்னீசியம் உதவுகிறது. இந்த என்சைம்கள் உடலில் செயல்புரிய மக்னீசிய அயனிகள் தேவை.
பிப்.: சரி, அப்ப மனித உடலில் மக்னீசியம் குறைந்தால் என்ன ஆகும்?
பியூ.: மக்னீசியம் குறைபாடு சிறுநீரகச் செயல்பாடுகளையும் குடல்-இரைப்பை பிரச்சினைகளையும் ஏற்படுத்தலாம். அது மட்டுமல்ல இயல்பற்ற நரம்புத் தூண்டல், ரத்தக்குழாய் விறைப்பு போன்றவற்றை மட்டுப்படுத்தவும் மக்னீசியம் பயன்படுத்தப்படுது.
பிப்.: மனுசங்களுக்கு மக்னீசியம் எப்படிக் கிடைக்குது?
பியூ.: பசலைக் கீரை மட்டுமில்லாம முட்டைக்கோஸ், பரங்கி விதை, பார்லி, சோயா, கொக்கோ, சமைக்கக்கூடிய இலைக் காய்கறிகள் போன்றவற்றில் மக்னீசியம் உள்ளது.
பிப்.: எல்லா காய்கறியுமே இலையுள்ள தாவரங்களில் இருந்துதானே காய்க்குது?
பியூ.: நீ சொல்றது சரிதான், நான் சொல்ல வந்தது சமைக்கப் பயன்படுத்தும் இலைகளைத்தான். பெரும்பாலான தாவரங்கள், காய்கறிகள்ல மக்னீசியம் அதிகமா இருக்கு.
பிப்.: அதுக்குக் காரணம்?
பியூ.: தாவரங்கள் பச்சையத்தை உருவாக்கவும் ஒளிச்சேர்க்கையை நடத்தவும் மக்னீசியம் அவசியம். மக்னீசியம் இல்லைன்னா, இந்த இரண்டு செயல்பாடுகளும் பாதிக்கப்படும், தொடர்ச்சியா தாவர வளர்ச்சியும் பாதிக்கப்படும். ஒவ்வொரு தாவர இலையிலும் சூரிய ஒளியை கிரகித்து உணவு தயாரிக்கும் பகுதியில மக்னீசியம் அதிகம் இருக்கும்.
பிப்.: அப்ப மக்னீசியம் ரொம்ப முக்கியம்தான்.
பியூ.: தாவர இலைகள் மட்டும்தான் என்றில்லை. எல்லா உயிரினங்களின் செல்களிலும் மக்னீசியம் இருக்கு.
பிப்.: ஓ! அப்படியா?
பியூ.: பிரபஞ்சத்தில் அதிகம் கிடைக்கும் ஒன்பதாவது தனிமம்; பூமியின் மேலோட்டில் அதிகம் கிடைக்கும் எட்டாவது தனிமம்; பூமியின் மொத்த எடையில் 13 சதவீதம்; இரும்பு, ஆக்சிஜன், சிலிகானுக்கு அடுத்தபடியா அதிகம் கிடைக்கும் தனிமம்; கடல் நீரில் கரைந்துள்ள சோடியம், குளோரினுக்கு அடுத்தபடியா அதிகமுள்ள தனிமமும் இதுதான்.
பிப்.: இத்தனை பெருமைகளா?
பியூ.: உலகிலுள்ள மக்னீசியம் அனைத்தையும் சேர்த்தால், செவ்வாய்க் கோளின் அளவுக்கு இருக்கும்.
பிப்.: இத்தனை பெருமைகளைக் கொண்ட இந்தத் தனிமத்துக்கு ஏன் மக்னீசியம்னு பேரு வெச்சாங்க?
பியூ.: கிரேக்கத்தின் ஒரு பகுதிக்கான கடவுள் மக்னீசியா. அந்தப் பகுதியில் மக்னீசியத் தாது அதிகம் கிடைச்சது. அதனால், அந்தப் பகுதியின் பெயரையே, இந்தத் தனிமத்தின் பெயராக வெச்சுட்டாங்க.
பிப்.: எல்லா புகழும் மக்னீசியாவுக்கும் மக்னீசியத்துக்கும் சேரட்டும்.
இந்த வாரத் தனிமம் - மக்னீசியம்
வெள்ளியைப் போன்ற வெள்ளை நிறத்தில் இருக்கும். பெரும்பாலும் ஆக்சிஜன், கால்சியத்துடன் இணைந்து சேர்மமாகவே காணப்படுகிறது. உலகில் இரும்பு, அலுமினியத்துக்கு அடுத்தபடியாக அதிகம் தேவைப்படும் உலோகம் இது. வலுவான, அதேநேரம் எடை குறைந்த கலப்பு உலோகங்களை உருவாக்க மக்னீசியம் பயன்படுத்தப்படுகிறது.
|
தொடர்புக்கு: valliappan@thehindutamil.co.in
0 Comments
குறிப்பு
1.கல்வி அமுது வாசகர்கள் அனைவரையும் அன்புடன் வரவேற்கிறோம்..
2.அனைவரும் தங்கள் பெயர் மற்றும் மின்அஞ்சல் முகவரி கொடுத்து தங்கள் கருத்தை பதிவு செய்யவும்..
3.இங்கு பதிவாகும் கருத்துக்கள் வாசகர்களின் சொந்த கருத்துக்களே இதற்கு கல்வி அமுது எந்த விதத்திலும் பொறுப்பு ஆகாது..
4.பொறுத்தமற்ற கருத்துக்களை நீக்கம் செய்ய கல்வி அமுது வலைதளத்திற்கு முழு உரிமை உண்டு..
அன்புடன்: கல்வி அமுது